Marta Malo (Madril, 1975) itzultzaile eta ikertzaile independentea da. Besteak beste, egile feminista hauen lanak editatu eta itzuli ditu: Gayatri Chakravorty Spivak, Mariarosa Dalla Costa, Judith Butler, Nancy Fraser, Silvia Federici eta bell hooks.

Argitalpen- eta itzulpen-lanekin batera, ikerketako eta herri-pedagogiako proiektuak ere egin ditu, eta ikerketa/ekintzako praktikak eta lankidetzazko sorkuntzako praktikak garatu ditu espazio feministetan, hezkuntza-espazioetan eta osasun-espazioetan. Berak sustatzen lagundutako ikerketa-ekintzako ekimenen artean, hauek nabarmendu daitezke: Precarias a la deriva, Observatorio Metropolitano, Manos Invisibles, Entrar Afuera eta La Laboratoria.

Eskola publikoaren esparruan, ikasgelarako lankidetza-proiektuak sustatu ditu, hala nola Amiga Robot (Manuel Nuñez de Arenas HLHI), Teoría de Conjuntos (Manuel Nuñez de Arenas HLHI), Conversaciones en torno a la escuela (Arte Egoitzen Zentroa, Madrilgo Matadero zentroa), Experimenta educación. La escuela como laboratorio ciudadano (Puente de Vallecas) eta Hilos Maestros. Taller de arte postal en un aula hospitalaria (Reina Sofía Arte Zentro Nazionala).