Margaret Bullen antropologo feminista da, 1991tik Euskal Herrian bizi da, eta 2005az geroztik EHUn egiten du lan. Filologia Hispanikoan eta Frantses Filologian lizentziatua da, Bristolgo Unibertsitatean (1987), eta Filosofian doktorea (Gizarte Antropologia), Liverpooleko Unibertsitatean (1991). Arequipa-ko (Peru) herri gazteetako herri-erakundeak aztertu ditu.

Gaur egun, Euskal Herrian, AFIT antropologia feminista ikerketa-taldeko kidea da, eta honako proiektu honetan dihardu lanean: «Nuevas solidaridades, reciprocidades y alianzas: la emergencia de espacios colaborativos de participación política y rede­finición de la ciudadanía» («Elkartasun, elkarrekikotasun eta aliantza berriak: parte-hartze politikorako lankidetzarako eta herritartasunaren birdefiniziorako guneen sorrera»)  Azken urteotan, zenbait jai-erritualetan emakumeen parte-hartzea aldarrikatzearen ondorioz sortutako gatazken inguruan bildu dira Bullen-en ikerketak eta aktibismoa.

Ikerketan nahiz irakaskuntzan, ikaskuntza kolektiboa eta eraldatzailea bultzatzeko moduak bilatzen ditu, ikasleen artean elkartasuna sustatuz, eta talde, erakunde eta gizarte-mugimenduekin sareak ehunduz.